وقت العتب راح لاترجع تعاتبني
مات الأمل والبقا في رأس وجداني
ماني مثل ما انت خابرني وتحسبني
قلبي الأول صار قلب ثاني
خلاص مات الهوى لا تهدم ولا تبني
تركتني لين جا النسيان ناداني
العام أدور سبب منك يقربني
واليوم أدور سبب عشان تنساني
بعثرتني في هواك اليوم رتبني
نستني الناس شفت صرت وحداني
كان السهر في هواك اللي محببني
والحين حتى السهر يكبر على جفاني
أجيك يمحيني عتابي ويكتبني
مافيه طاري عتب يمر ما جاني
أرجع وأقول وش للجرح جايبني
أدري بجرحك ولا أدري وش وداني
عن صدق الأحلام جا الواقع وكذبني
وعن فرح الأيام جا حبك وبكاني
مليت أشيل الأمل والدمع يغلبني
وأقول بكره يجي للشوق يلقاني
ويروح بكرة وأجي والوقت قالبني
وارجع على وحدتي أحزاني وأحزاني
بكيتك العمر كله يا معذبي
وشفيك ماتبكي الليلة على شاني
كتبت ماهو عشان تقول عاجبني
مليت من جزلة وصح الله لساني
أنا وطن شعر لو شعري مغربني
كتبت أجمل جروحي لجل تقراني
خلاص لاتتعب وترجع تعاتبني
أنا نسيتك دخلي جروحك إنساني
الأحد فبراير 08, 2009 4:35 am
